Archive for 31 مايو, 2011

عن محاجرنا

محاجر في الدوادية_ خاص أرزقيات الصعيد

كتبتها: مرثا

كان في رجل بيعمل في المحجر وكان بيصرف علي مراته وبعدها اتوفي وساب ولد عنده 16 سنة طلع بعد ابوه ما توفي يشتغل في المصنع علشان يجيب رزق للبيت وفي نفس الوقت يروح المدرسة يتعلم يومين وباقي الاسبوع في المصنع لحد ما الولد تعب وجاله مرض اسمه زلال تعب جدا ومحتاج يصرف كتير في العلاج .

بدأت الام تشتغل في ادوات تجميل في البيت علشان تقدر ترعي الاولاد ودخلهم المدارس ومحدش بيساعدها في حاجة وملهاش دخل من أي مكان تاني وفضل ابنها اللي عنده زلال يشتغل في المحجر ويا ريت الفلوس اللي بياخدوها بتقضي المدارس ولا مصاريف البيت الواحد بيروح يشتغل في محجر المصنع يكون سليم ويرجع مفقود .

انابيب البوتاجاز فين ؟

سماح رايحة تملى انبوبة بوتجاز

الواحدة تقوم من الصبح علشان تملا الانبوبة وتسيب بيتها ومصالحها وليه لسه فيه المشاكل اللي كانت قبل الثورة ؟ ساعات بحس ان بلدنا هيبقي فيها مجاعة.

وليه الحاجة مش بترخص؟ عشان كلنا نبقي مرتاحين . الانبوبة وصلت ل خمسين جنيه طب لو الواحد علي قد حاله؟ هيجيب منين ؟ دا حرام وظلم يا ريت الاسعار تنزل وتبقي زي الاول علشان اولادكم ميموتوش ولا تحصل مجاعة بسبب الفلوس .

الاسعار لازم تتغير زي ما الثورة غيرت وكل الناس لازم تقول مطالبها عشان كل واحد يلاقي رزقه ورزق عياله هو احنا هنصرف علي ولادنا ولا علي الانابيب؟

نفسنا في مدرسة اعدادي في قرية الدوادية

من بنات قرية الدوادية

كتبتها: وردة

في قريتنا مفيش مدرسة اعدادي ، حيث يذهب نصف تلاميذ مدرسة الدوادية الابتدائية بعد الانتهاء من مرحلة التعليم الابتدائي ، يتوجهون الي القري المجاورة ، مثل قرية الحوارته ، والشرفا لان بها مدارس اعدادي.

وبسبب عدم وجود مدرسة اعدادي داخل القرية ، توجد صعوبات ومضايقات لتوصيل البنات الي المدارس الاعدادية في القري المجاورة، دا غير انه تعب عليهم جدا .

كمان حاول اهالي قرية الدوادية جمع فلوس من كل الاهالي عشان بني مدرسة اعدادي داخل القرية لكن مكنش في مسئول واحد اهتم انه ياخد الفلوس ويخصص قطعة ارض من اجل البناء.

لكن دلوقتي يا ريت صوتنا يوصل ليكم ويكون كلامنا مسموع علشان مستقبل يكون فيه الخير.

حكايات بنعيشها

أم تخبز في منزلها_ تصوير وردة من بنات الودادية

كتبتها: سمية

اول حكاية عن العيش
العيش مشكلة كبيرة لانه مش موجود اصلا
اولا عيش الاشتراك غير صالح لان به اشياء كتيرة من الحشرات ولمة العيش يبقي كدة صحتنا هتبقي ايه؟ وصحة اولادنا واحفادنا
من حقي اخد عيش نضيف لان انا بدفع كل شهر اتنين جنيه وربع اشتراك غير تمن العيش وبصحي الساعة خمسة عشان الحق العيش ويا ريت العيش بعد دا كله ينفع يتاكل ده عيش بيخسر صحة الانسان

الحكاية التانية عن الام
الام تعبت وربت وطول عمرها تعبانة وفي الاخر الاب بيرمي اولاده علي امهم تصرف عليهم وتوكلهم وتشربهم وتدي المصروف وتشتغل تبيع الخضار والفاكهة وكمان تسرح العيال لبيع الترمس والفشار وتكد وتعمل مثله او اكتر منه
هي تصرف علي اولادها وهو يصرف علي شهواته ولا يراعي حق ربنا في ولاده هل هذا الاب مثالي ؟

قصة حقيقية

الحاجة فوزية وبعض احفادها وبنات من الودادية _خاص ارزقيات الصعيد

كتبتها: م.ع

أنا فلانه ، من بنات قرية الدوادية، عاوزة اكتب عني انا ابويا متوفي وانا في تالتة اعدادي ، وليه اربع اخوات بنات وولد انا خلصت اعدادي و بشتغل علشان اساعد امي في دخل البيت اخويا مش بيشتغل لانه عنده حالة نفسية هو متجوز وعنده 3 عيال ولد وبنتين
انا دلوقتي مخطوبة وبدأت اصرف علي نفسي واشتري جهازي والمفروض اني بساعد امي في حاجات البيت لكن مش عارفة ازاي؟ ولا هعمل ايه؟ وكمان اختي اللي في تالتة اعدادي نفسي انها تكمل لكن دا عاوز فلوس كتير يا ريت الاسعار تنزل علشان الواحد يعرف يصرف ويجيب اللي هو عاوزه
بطلب من كل شاب او بنت انه يساعد اهلهم علي اد ما يقدروا انا بشتغل من عمر 18 سنة علشان اقدر اجيب اللي نفسي فيه وكمان افرح اهلي وامي لانها دايما فرحانة بيا جدا علشان بجيب دخل يساعد فرحها بيخليني انسي تعب الشغل
لازم نتحمل علي اد ما نقدر مش غلط ، انا كبرت قوي في نظر امي وقلبها مليان بالحب والسعادة واتمني نعيش كلنا في امان دايما

تجربتي مع الختان

من قرية الدوادية

كتبتها: ( ن) .. من بنات قرية الدوادية بالمنيا

انا كنت بسمع عن تجربة ختان الاناث وكنت بسمع عن بنات كانت بتضر منه، وفي يوم سمعت امي وهيا بتتفق مع الداية اللي هتختني وحاولت اقول بأعلى صوت حرام يا امي، انا مش عايزة اتختن انا بخاف، انتي مش عارفة يا امي الأضرار اللي بتيجي من ورا الختان، دا ممكن يسببلي صدمة عصبية وممكن يسببلي التهابات في البول وكمان عقم.

حاولت اقول بأعلى صوت حرام عليكم، دا مفيش في القرآن ولا الانجيل حاجة بتقول كدا .
لكن في الآخر جت الداية واتنين معاها ومسكوني ماسكة وحشة، ولقيت واحدة بتسد حنكي، والتانية ماسكة رجلي
بعدها مكنتش قادرة اقف على رجلي ولا ادخل الحمام ولا قادرة اقعد كويس، وبعد اسبوع بقيت كويسة. في بلدنا الدوادية في بنات بتنزف من الختان بس مابيروحوش للدكتور عشان ماينفعش تقول انها اتختنت انا.

اما انا فمضايقة اني اتختنت، وانا مكنتش عايزة دا، ولو الحكم في ايدي لما يبقى عندي بنات مش هختنهم

موضوع التدريب

تدريب بتاعنا الاول احنا فهمنا بس مش قوي ، وكمان كان في خوف بينا وبينكم وكنا مكسوفين نسأل علي اي حاجة
لكن بعد ما اخدنا عليكم وابتدينا نسأل من غير خوف انا واحدة كنت بخاف جدا اسأل لكن دلوقتي انا اتعودت أسأل واعرف كل حاجة وانا والحمد لله عرفت كل اللي عاوزاه ، وفرحانه لان المرة دي عرفت اكتر صحيح تعبنا معانا الاستاذات لكن كلنا لازم نتعب علشان نتعلم ونتحرر
ويا ريت الزيارة الجاية تيجي بسرعة.
مرتا عطية